Stórleikur í íslenskum handbolta mun fara fram í Kaplakrika þegar Hafnarfjarðarliðin FH og Haukar eigast við öðru sinni á þessu tímabili, nú í 8 liða úrslitum Eimskipsbikarsins. Leikið verður á sunnudaginn kl 15:30 og verður hann sýndur í beinni á RÚV. Fjölskylduhátíð verður í kringum leikinn og opnar húsið kl 14:30. Í síðustu rimmu þessara liða 5. nóvember fylltist Krikinn þegar um 2500 manns mættu á frábæran handboltaleik.

• FH TV - Auglýsing FH-Haukar
• Forsala í Firði, laugardag

Fjölskylduhátíð í kringum leikinn!

Þó svo leikurinn hefjist 15:30 byrjar fjörið strax klukkutíma fyrr eða kl 14:30. Eins og auglýsingin hér að ofan sýnir mun enginn annar en Einar Ágúst úr Skítamóral troða upp fyrir leik. myndasýning úr leikjum FH verður varpað á skjá, það verður pizzusala, andlitsmálning, varningur merktur FH verður seldur og dreifing leikmannamynda verður einnig í boði ásamt fleiru. Ekki má gleyma ljósashowinu og hálfleiksleiknum fræga. Það er því af nógu af taka fyrir fjölskyldufólk á sunnudaginn en þess má geta að frítt er á leikinn fyrir ungmenni 16 ára og yngri! Við hvetjum fólk til að mæta snemma. Á síðasta FH-Hauka leik komust færri að en vildu...

Gengi liðanna í Eimskipsbikarnum og í deild.

FH lék þann 7. október gegn Víkingi 2 í Víkinni í 32 liða úrslitum og sigruðu léttilega 22-45. Liðið lék síðan gegn Akureyri 9. nóvember í 16 liða úrslitum á heimavelli og sigruðu 37-31 í hörkuleik þar sem FH snéri leiknum sér í vil í seinni hálfleik.

Haukarnir sátu hjá í 32 liða úrslitum. Þeir léku í 16 liða úrslitum 11. nóvember við ÍR á útivelli sem leikur í 1. deild og sigruðu létt 24-32.

Haukarnir hafa byrjað illa í mótinu, leikið upp á ofan en gengið vel í Meistaradeildinni og eru komnir áfram í Evrópukeppni bikarhafa. Haukarnir virðast þó vera komnir á beinu brautina eftir stórsigur á Akureyri um daginn og góðan sigur gegn HK í gær.

FH liðið hefur byrjað afar vel og tapað aðeins þremur leikjum í deild af tíu leikjum eftir að hafa komið úr 1. deildinni í vor. Hafa sigrað fimm og gert 2 jafntefli. FH sigraði Víking í gær sannfærandi og hafa verið afar stabílir í vetur miðað við ungt og reynslulítið lið.

FH liðið situr í 2. sæti en Haukar í 5. sæti.

Síðasta rimma

Síðasta rimma milli FH og Hauka var leikin í Kaplakrika fyrir framan troðfullu húsi og færri komust að en vildu. Áhorfendur upplifðu frábæran handboltaleik þar sem Haukamenn réðu lögum og lofum í fyrri hálfleik og leiddu í hálfleik 13-17. FHingar létu mótlætið ekki á sig fá. Jöfnuðu og komust yfir fljótlega í seinni hálfleik. Leikurinn var síðan jafn allt til leiksloka en Aron Pálmarsson skoraði síðan sigurmarkið 29-28 og allt ætlaði um koll að keyra í Krikanum.

Haukaliðið

Haukar hafa á að skipa geysilega sterkum hópi. Þeirra bestu menn í vetur hafa helst verið þeir Sigurbergur Sveinsson, Andri Stefan og Kári Kristjánsson og eru auðvitað með sterkan markvörð í Birki Ívari. Addi P er svo fastur fyrir á í vörn en það er í raun sama hvaða staða í Haukaliðinu er skoðuð, þar er sterkur leikmaður á ferð. Aron Kristjánsson er auðvitað afar snjall og öflugur þjálfari. Það yrðu stórtíðindi ef liðið ynni ekki titla í ár miðað við þann mannskap sem Ásvallarliðið hefur á að skipa.

Undirbúningar

Undirbúningur fyrir Haukaleikinn fer á fullt í dag eftir góðan sigur gegn Víking í gærkveldi þar sem okkar menn þurfti ekki mikið að hafa fyrir hlutunum. Það verður þó allt annað uppi á teningnum á sunnudag þar sem barist verður til síðasta blóðdropa um Fjörðinn!

Ástand

Ástand er að mörgu leyti mjög gott. Við höfum endurheimt Jón Helga Jónsson úr axlarmeiðslum sem er okkur mikilvægur í hægri skyttunni og inn á gólfið mun stíga Hjörtur nokkur Hinriksson fyrirliði sem mun fórna sér í þetta stóra verkefni eftir erfið ökklameiðsli. Meiddir og missa því miður af þessum stórleik eru þeir Ólafur Gústafsson, Árni Stefán Guðjónsson, Heiðar Örn Arnarson og Benedikt Kristinsson.

Liðin

• Lið FH
• Lið Hauka
• FH-Haukar 5. nóvember

Staðan í deild

Nr. Félag Leik U J T Mörk Nett Stig 1. Valur 10 5 3 2 278:243 35 13 2. Akureyri 10 6 0 4 267:274 -7 12 3. FH 10 5 2 3 302:293 9 12 4. Fram 9 5 2 2 254:245 9 12 5. Haukar 9 5 0 4 263:238 25 10 6. HK 10 4 2 4 267:278 -11 10 7. Stjarnan 9 2 2 5 225:237 -12 6 8. Víkingur 9 0 1 8 235:283 -48 1

Aðrir leikir í Eimskipsbikarnum

8 liða úrslit
Sun. 7.des.2008	17.00	Mýrin	Stjarnan 2 - Grótta
Mán. 8.des.2008	19.30	Framhús	Fram - Valur
Mán. 8.des.2008	19.30	Selfoss	Selfoss - Stjarnan

Stuðningur

Stundin fer að renna upp. Ekki láta þér detta í eina einustu mínútu FHingur góður að láta þennan stórleik framhjá þér fara. Þeir sem mættu í Krikann 5. nóvember sl. þegar liðin áttust við síðast upplifðu ótrúlegan handbolta og fyrsta flokks stemmningu. Líkur eru á svipaðri upplifun aftur á sunnudaginn. Það er við hæfi að enda þetta á eftirfarandi Jóhanns Skagfjörð Magnússonar kynnis á leikjum FH, stórmúsíkants og ljóðsskálds með meiru:
“Stærsti leikur ársins í íslenskum handbolta er að renna upp. Bræðrabyltan. Slagurinn um Hafnarfjörð. FH gegn Haukum. Fræðimenn segja að orðtakið "blóð, sviti og tár" hafi fyrst verið notað um leik þessara liða snemma á síðustu öld.
 
Það er morgunljóst að stemmningin í Kaplakrika verður rafmögnuð. Bæði lið eru með frábært lið og munu leika til sigurs. Þegar öllu verður á botninn hvolft gæti vel farið svo að það verði stuðningur áhorfenda sem ræður úrslitum.
 
Við ætlum að leggja okkar af mörkum til að FH haldi efsta sætinu í N1 deild karla í handknattleik. Við ætlum að leggja okkar af mörkum í að hefja nýja gullöld í Kaplakrika.
 
Framtíðin er FH. Framtíðin er núna.”

Áfram FH!!!



Ert þú ekki örugglega búinn að skrá þig í Mugg??

Hvað fæ ég við að skrá mig í Mugg?    

    * Frítt fyrir fjölskylduna inn á alla heimaleiki meistaraflokka karla og kvenna (ekki þó á tekjuskipta leiki svo sem bikarleiki og oddaleiki í úrslitakeppni)
    * Frítt fyrir korthafa og maka á hið veglega Muggarahóf sem haldið er á hverjum vetri og ýmsar aðrar uppákomur yfir veturinn.
    * Nafn skuldlausra korthafa lendir í potti einu sinni á ári sem úr er dregin utanlandsferð
    * Þetta allt fyrir aðeins  1.400 krónur hvern mánuð.

Tökum þátt í handboltaveislunni í Krikanum og styðjum strákana og stelpurnar!

Ég vil skrá mig í Mugg

Frekari upplýsingar um Mugg

Áfram FH!!