N1 deild karla og kvenna

      

Íþróttahúsið Kaplakriki, laugardagurinn 11. október, kl. 14:00 og 16:00

Laugardaginn 11. október verður mikill handboltadagur í íþróttahúsinu í Kaplakrika frá kl. 12 – 17:30. Dagskráin verður frábær. Konurnar hefja leik kl 14:00 og karlarnir kl. 16:00. Báðir leikirnir verða sýndir á RÚV.

Valur hefur á að skipa gríðarsterku karla og kvennaliði með valinn einstakling í hverju rúmi. Bæði FH liðin ætla þó að selja sig dýrt en þau hafa byrjað mótið frábærlega.

Gengi liðanna gegn Val

Stúlkurnar

Samkvæmt upplýsingum af HSÍ vefnum hafa liðin leikið 39 sinnum sín á milli frá 1995.  FH hefur unnið 13 leiki, Valur 24 og tvisvar sinnum skildu liðin jöfn.  Síðustu tvö tímabil hefur Valur unnið alla 8 leikina nokkuð örugglega en fram að þeim tíma voru innbyrðis viðureignir jafnar.  Valsliðið er sterkara í ár en það var í fyrra. Það hefur bætt sterkum leikmönnum við kjarna sem hefur lengi æft saman og því ljóst að leikurinn verður erfiður fyrir stelpurnar okkar.  Þær eru þó hvergi bangnar og munu gera allt sem þær geta til að snúa taflinu við á laugardaginn!

Drengirnir

Samkvæmt upplýsingum af vef HSÍ hafa liðin leikið 18 sinnum frá árinu 1995. FH hefur sigrað 7 sinnum, Valur 8 sinnum og 3 leikir hafa endað með jafntefli. Liðin hafa ekki mæst síðan árið 2006 í Íslandsmótinu þar sem FH beið lægri hlut í 2 leikjum. Fyrir þann tíma hafði FH sigrað í 5 af 8 leikjum liðanna frá aldamótum. Valsliðið er afar sterkt með silfurleikmann frá ÓL innanborðs ásamt silfurþjálfara frá ÓL. Liðið hefur átt við mikil meiðsli að stríða en vermir samt sem áður toppsætið. FH drengirnir hlakka til að taka á Valsmönnum á laugardaginn og freista þess að ná fyrsta sigri þeirra á liðinu síðan 2003.

Gengi liðanna í haust og frammistaða einstakra leikmanna

Stúlkurnar

Stúlkurnar hafa leikið 3 leiki í N1 deild kvenna.

Fyrsta viðureignin var við Gróttu úti á Nesi.  Sá leikur spilaðist ekki vel og endaði með eins marks tapi 22-21. Stúlkurnar voru í raun klaufar að fá ekki stig þar sem þær misnotuðu hvert tækifærið á fætur öðru.

Því næst tóku FH stúlkur á móti HK í Kaplakrika. Þær mættu grimmar til leiks og tóku strax forystu. Leikurinn var afar jafn en staðan í hálfleik var 11-11. FH liðið var þó betri aðilinn og innbyrti verðskuldaðan sigur, 25-24. 

Þá sóttu FH stúlkur Fylki heim í Árbæinn þar sem þær unnu nokkuð sannfærandi sigur, 23-28. FH var þó ekki að spila sinn besta leik. Seinni hálfleikurinn gerði gæfumuninn eftir að stúlkurnar höfðu verið 2 mörkum undir í hálfleik og lagði grunninn að fimm marka sigri.

Þær Guðrún Helga Tryggvadóttir, Gunnur Sveinsdóttir, Hafdís Inga Hinriksdóttir, Helga Vala Jónsdóttir og Ragnhildur Rósa Guðmundsdóttir hafa spilað best það sem af er hausti.

FH er í 2.-4. sæti í N1 deild kvenna með 4 stig.

Drengirnir

Drengirnir hafa leikið 3 leiki í N1 deild karla og 1 leik í Eimskipsbikarnum.

Fyrsti leikur var gegn Akureyri. Eftir frábæran lokasprett innbyrtu FH drengirnir sigur  eftir háspennuleik, 26-31. Akureyri voru líklegri til afreka í leiknum og stjórnuðu lengst af en FH liðið var hungraðara á lokasprettinum.

Því næst tók FH á móti HK í Kaplakrika. Leikurinn bauð upp á allt sem skemmtilegur handbolti getur boðið upp á, baráttu, spennu og frábæra stemmningu. Að endingu sigruðu HK menn 33-36 en FH hefði hæglega getað jafnað leikinn undir lokin.

FH mætti svo í Víkina og sigraði Víkinga nokkuð létt eftir að hafa leitt allan leikinn. Lokatölur voru 27-29 en þær tölur gefa ranga mynd af gangi leiksins því FH náði 7 marka forystu þegar um 8 mínútur voru til leiksloka.

FH lék síðan í Eimskipsbikarnum í vikunni og innbyrti laufléttan sigur gegn Víkingi 2 í Víkinni. Lið Víkings 2 byggir á gömlum handboltakempum sem hafa lagt skóna á hilluna frægu. Lokatölur 22-45 FH í vil.

Þeir Aron Pálmarsson, Ásbjörn Friðriksson, Ólafur Guðmundsson og Sigurður Ágústsson hafa spilað best það sem af er hausti.

FH er í 2.-4. sæti N1 deildarinnar með 4 stig.

• Kvennalið FH
• Karlalið FH
• Tölfræði kvennaliðsins í vetur
• Tölfræði karlaliðsins í vetur

Stuðningur

Laugardagurinn verður fjölskyldudagur eins og hann gerist bestur. Frábær afþreying fyrir unga sem aldna og metnaðarfull dagskrá frá kl 12 til 17:30. FH stúlkur hefja leik kl. 14:00 og FH drengir kl. 16:00 eins og áður segir. Það er ljóst að um virkilega erfiða leiki verður að ræða fyrir bæði lið.

Í báðum Valsliðunum er valinn maður í hverju rúmi og engin tilviljun að þeim var spáð 2. sæti í N1 deild karla og kvenna. Okkar lið eru þó hvergi bangin og hafa mikið sjálfstraust. Liðin hafa byrjað frábærlega og eru í góðri stöðu í deildinni.

Leikirnir verða mjög erfiðir en með stuðningi áhorfenda eiga liðin eftir að ná langt. Því hvetjum við ykkur kæru FHingar að taka þátt í þessum fjölskyldudegi og styðja við bakið á stelpunum og strákunum okkar. Með ykkar stuðning að vopni fara liðin alla leið!

Viðtöl við þjálfara liðanna vegna leikjanna verða birt á vefnum á morgun og viðtal við stórmenni í íslenskum handbolta kemur í kjölfarið. Fylgist með!

Áfram FH!