Tap og FH í jólafrí

    

29-20

N1 deildin, fimmtudagurinn 11.desember 2008, 19:30

FH lagði leið sína í Vodafone höllina á fimmtudagskvöldið. Eftir mjög góða byrjun hallaði verulega undan fæti hjá strákunum og áttu þeir fá svör við varnarleik Valsmanna í seinni hálfleik. Lokatölur urðu 29-20 fyrir Val eftir að hafa staðan hafi verið 12-11 í hálfleik fyrir Hlíðarenda-liðinu.

Fyrri hálfleikur

FH byrjaði mjög vel eins og áður sagði. Liðið komst í 2-6 og leikur þess var skynsamur og yfirvegaður í sókn sem vörn þó svo að Valsmenn kæmu, öllum að óvörum, framar á móti Aroni og Ólafi Guðmunds. Línumenn okkar Siggi og Jónatan voru hreyfanlegir og útispilarar sendu óspart á þá sem gaf mörg mörk. Fljótlega í fyrri hálfleik breyttist leikurinn. Fréttaritari fh.is hefur haft það sem reglu að fjalla ekki um frammistöðu dómara í pistlum sínum en nú verður ekki hjá því komist. Hver furðudómurinn rak annan í fyrri hálfleik sem klárlega höfðu áhrif á leik okkar. Klárlega hallaði á FH liðið, auk þess sem menn pirruðust upp og liðið missti dampinn.  Valsmenn gengu á lagið og jöfnuðu í 10-10 og voru síðan 12-11 yfir í hálfleik.

Seinni hálfleikur

Það var þó engan veginn dómurum leiksins að kenna að FH liðið kom hálf slegið til seinni hálfleiks og Valsliðið komst í 17-14. Hver byrjendamistökin ráku annað og oft á tíðum kastaði liðið boltanum frá sér og Valsmenn skoruðu nokkurn fjölda af mörkum úr hraðaupphlaupum. Valur náði síðan 24-18 forystu og allur vindur virtist úr FH liðinu og var enginn leikmaður undanskildinn. Þetta var ekki dagur okkar FHinga og lokatölur urðu síðan 29-20.

Niðurstaðan

Niðurstaðan er heldur súr. Eldmóðurinn sem við höfum séð í liðinu í allan vetur virtist fjara út síðasta korterið og því miður var Valsliðið of stór biti í þetta skiptið. Lykilleikmenn fundu sig ekki og liðið virtist sakna Ásbjarnar í þessum leik en hann tók út leikbann í þetta skiptið. Fyrir vikið missir FH liðið naumlega af þáttöku í deildarbikarkeppninni sem leikin verður á milli jóla og nýárs. En þessum leik er lokið, það er nóg eftir af móti og árangur liðsins hingað til prýðilegur. FH fer því tiltölulega sátt í jólafrí og mun nýta það til frekari æfinga og styrkingar fyrir komandi átök á nýju ári.

Mörk FH:

Jónatan Jónsson 4

Aron Pálmarsson 4

Guðmundur Pedersen 3

Sigurður Ágústsson 3

Örn Ingi Bjarkason 2

Reynir Jónasson 1

Hjörtur Hinriksson 1

Ólafur Guðmundsson 1

Staðan

Stuðningur

FH liðið fékk gríðarlega góðan stuðning á fimmtudaginn og voru klárlega háværari en Valsstuðningsmenn og hugsanlega fleiri. Þó svo illa hafi farið að þessu sinni munu áhorfendur hlaða batteríin um jólin og fylkjast með liðinu þegar mót byrjar eftir áramót.

Áfram FH!!