Frábær FH-sigur í Belgíu

FH mætti Initia Hasselt í 2. umferð EHF-keppni karla í Belgíu í dag. Leikurinn var gríðarlega kaflaskiptur og tvisvar sinnum í leiknum virtust okkar menn vera búnir að knýja fram sigur. Lokamínútur leiksins voru æsispennandi en strákarnir náðu að sigra með einu marki, 29-28. Seinni leikurinn fer fram eftir viku, sunnudaginn 16. október í Kaplakrika.

Initia Hasselt – FH 28-29 (12-18).

Leikurinn var jafn framan af en FH-ingar voru þó ávallt skrefi á undan Belgunum. Staðan eftir 25. mínútna leik var 16-10 fyrir FH og 18-12 í hálfleik. Staðan leit vel út fyrir FH-inga í hálfleik en Belgarnir spíttu í í seinni hálfleik. Því eftir tæplega 20. mínútna leik í síðari hálfleik var staðan 20-20 og allt með Belgunum sem höfðu skorað átta mörk gegn tveimur frá FH. FH-ingar spíttu hins vegar í og náðu góðum kafla og komust í nokkuð vænlega stöðu á 48. mínútu leiksins, 25-21. Belgarnar voru þó ekki á því að gefast upp og minnkuðu muninn í eitt mark 25-24 þegar tíu mínútur lifðu eftir leiks. Síðustu mínútur leiksins voru æsi spennandi og er þrjár mínútur lifðu eftir leiks var staðan 29-27 fyrir FH, sem náði að knýja fram sigur með mikilli baráttu, 29-28.

Lítið var hægt að fylgjast með markaskorurum á heimasíðunni hjá Belgunum en þeir uppfærðu þó stöðuna í leiknum sem er flott hjá þeim. Þeir sögðu þó frá því að Ólafur Gústafsson hefði fengið rautt spjald í leiknum um miðbik síðari hálfleiks.

Næsti leikur hjá strákunum er 13. október á útivelli gegn HK klukkan 19:30. Svo næst gegn Initia Hasselt í Kaplakrika sunnudaginn, 16. október og að lokum gegn Gróttu 20. október á heimavelli klukkan 19:30. Svo kemur sjö daga frí hjá strákunum áður en þeir mæta Aftureldingu 27, október. Það er því ljóst að mikið álag verður á strákunum sem koma til með að leika 3 leiki á sjö dögum!!!