Toppslagur - FH-Akureyri

FH - Akureyri

Kaplakriki, fimmtudagurinn 13. nóvember 2008, kl 19:30

Topplið N1 deildar karla eigast við á fimmtudagskvöldið 13. nóvember kl 19:30, en þetta eru auðvitað við FHingar og Akureyri. Liðin hafa spilað mjög vel í deildinni þrátt fyrir spá manna um annað. Liðin eigast nú við með nokkurra daga millibili því FH lagði Akureyri af velli í 16 liða úrslitum Eimskipsbikarsins á sunnudaginn var.

Gengi liðanna

Akureyri hefur komið mjög á óvart í deildinni í haust og er í öðru sæti á eftir okkur FHingum. Akureyri tapaði fyrir Hafnarfjarðarliðunum í fyrstu tveimur leikjum en hefur síðan unnið 5 leiki í röð í deildinni með frábærri spilamennsku og ekta norðanmannaseiglu og stemmningu. FH hefur ekki síður komið fólki á óvart og flestir ekki búist við að FH og Akureyri yrðu efst eftir 1. umferð deildarinnar. FH hefur sigrað Hauka, Akureyri, Víkinga og Stjörnumenn, gerðu jafntefli við Val og Fram og tapaði einum leik gegn HK. Þetta gerir 10 stig á lið. FH vann síðan Akureyringa eftir kaflaskiptan leik í Bikarnum á sunnudaginn var. Stórviðburður í aðsigi.

Akureyrarliðið

Akureyri hefur spilað betur en menn þorðu að vona miðað við þá krísu sem liðið lent í sl. sumar þegar fjöldi leikmanna yfirgaf liðið, en með grettistaki náðu menn að standa saman á Akureyri og liðinu hefur gengið frábærlega eftir erfiða byrjun. Andri Snær Stefánsson hefur verið frábær í liði Akureyrar í haust og skorað mikið í leikjum. Jónatan Magnússon hefur einnig verið góður sem og Árni Sigtryggson. Hafþór markvörður hefur síðan verið frábær milli stanganna. Rúnar þjálfari hefur loks náð að skapa einingu útúr brotum KA og Þórs og miðað við spilamennsku í síðustu leikjum er Akureyri til alls líklegt í vetur.

Undirbúningur

Um tvo baráttuleiki er að ræða við Akureyri með stuttu millibili. Akureyringar sem hafa verið á siglingu í deildinni eru varla hrifnir af því að tapa tvisvar fyrir FHingum í röð svo að leikurinn á fimmtudag verður allt annar og erfiðari en á sunnudag. Drengirnir gera sér grein fyrir þessu og nú er mál að halda einbeitingu frá byrjun og framkalla þetta sigurhugarfar áfram sem einkennt hefur liðið í haust.

Ástand

Sjúkralistinn er sá sami og áður. Hjörtur er að finna bót meina sinna, og þeir Óli Gúst, Árni Stefán og Heiðar allir utan vallar. Liðið er annars í hörkustandi og menn engan veginn búnir að fá nóg af stórleikjum.

Staðan

Aðrir leikir

Stuðningur

Fyrsta sætið er í húfi. FH fer í hvern leik til þess að sigra og engin ástæða til þess að fara að tapa fyrir Akureyri núna. Við hvetjum ykkur kæru FHingar að fjölmenna og mynda áfram frábæra stemmningu í Krikanum. FH liðið er á þeim stað sem þeim ber að vera og þurfa stuðning okkar til að svo megi verða. Takið fimmtudaginn frá og mætum öll með FH hjartað.

Muggur

Ert þú orðinn Muggari? Skráðu þig í Mugg, stuðningsmannafélag Handknattleiksdeildar FH á www.123.is/muggur og fáðu árskort fyrir þig og þína fjölskyldu á heimaleiki FH í karla og kvennaflokki. Með þessu styðurðu einnig handknattleiksdeildina.

Tökum þátt í handboltaveislunni í Krikanum og styðjum strákana og stelpurnar!

Áfram FH!!!