Baráttan um Fjörðinn 2008 - Þjálfararnir

Elvar Erlingsson

Það hlýtur að vera gaman að fá aftur alvöru Hafnarfjarðarslag eftir fjarveru okkar frá deild þeirra bestu?

Já klárlega, þessi leikur ætti að trekkja að og hafa hátt skemmtanagildi. Við í FH bíðum spenntir eftir þessum leik og munum selja okkur dýrt á móti Hauk-unum, sem eru firnasterkir.

Þú hlýtur að vera ánægður með framgöngu FH-inga það sem af er móti? Erum við kannski að fara að sjá liðið gera atlögu að úrslita-keppninni í vor?

Já það er ekki annað hægt en að vera mjög ánægður með gengi liðsins, en það er ekki nema þriðjungur búinn af deildarkeppninni og við höldum því enn fast við okkar markmið, sem er að halda okkur í deildinni.

Hvernig finnst þér mótið hafa farið af stað almennt séð, leikir, umgjörð og slíkt?

Mótið hefur farið vel af stað, liðin hafa lagt metnað í umgjörð leikja og leikir hafa verið jafnir og fjörugir, margir ungir leikmenn eru að stíga á stokk og hafa staðið sig vel. Deildin virðist einnig vera nokkuð jöfn og virðast flest lið geta unnið hvort annað.

Haukarnir virka ógnarsterkir ef mið er tekið af frammistöðu þeirra í Evrópukeppninni. Eigum við einhverja möguleika gegn þeim og hvað þurfum við til að ná góðum úrslitum?

Haukarnir eru mjög vel mannaðir og reynslumiklir, enda Íslandsmeistarar og hafa staðið sig frábærlega í Meistaradeildinni. Við fyrstu skoðun ættu möguleikar okkar á sigri að vera sáralitlir, en aftur á móti ef við náum upp samheldni og óþrjótandi baráttu gætu óvæntir hlutir gerst.

Nú hefur áhorfendafjöldi stóraukist í Krikanum á fyrstu heimaleikjum og umgjörðin stór-batnað. Þið hljótið að vera ánægðir með það?

Já við erum þakklátir okkar stuðningsfólki. Á meðan við stöndum okkur vel þá söfnum við í húsið og stjórnin hefur gert góða hluti varðandi umgjörðina.

Spá um úrslit?
Nei, en við munum klárlega gera tilkall til stiganna tveggja.

Aron Kristjánsson

Hvernig líst þér á að fá aftur alvöru Hafnarfjarðarslag eftir fjarveru FH-inga úr efstu deild?

Það er virkilega gaman að því að FH-liðið sé aftur komið í efstu deild og leikir liðanna munu vonandi krydda tilveruna hjá Hafnfirðingum í vetur.

Nú hafa FH-ingar farið vel af stað í mótinu, kannski betur en margir áttu von á. Hefur það komið þér á óvart?

FH-liðið er mjög spennandi lið. Hafa marga mjög efnilega leikmenn innan sinna raða og svo nokkra reynslubolta eins og vin minn hann Magnús Sigmundson. Ég verð að segja það að leikir FH á móti Val og Fram komu mér töluvert á óvart og fannst mér mikill klaufaskapur hjá FH-liðinu að vinna ekki báða þessa leiki. Þeir voru með frumkvæðið mest allan tímann í báðum leikjum en reynsluleysið varð þeim væntanlega að falli.

Heldur þú að við fáum að sjá alvöru FH-Hauka leik eins og oft var „i den”?

Það væri nú skemmtilegt! Þetta voru skemmtilegustu leikirnir að spila. Miðað við það hvernig liðin hafa farið af stað í deildinni þá tel ég að það verði skemmtilegir leikir milli þessara liða í vetur.

Staðan á þínu liði, er Evrópukeppnin mögulega að trufla leik liðsins í deildinni hér heima?

Já, það er nú bara þannig að þegar lið leika í Meistaradeildinni þá virðist það alltaf trufla þau í deildinni hér heima. Allir leikmenn liðsins eru annaðhvort í fullri vinnu eða námi og margir með fjölskyldur. Þannig að það er mikið álag á leikmönnunum þegar þeir þurfa að sinna þessu öllu saman og leikið er á 3-4 daga fresti. Stóru leikirnir verða óhjákvæmilega leikirnir í Meistaradeildinni og þá er einbeitingin í toppi. Við erum hinsvegar að vinna í því að bæta einbeitinguna fyrir deildarleikina.

Handboltinn almennt. Hvernig finnst þér veturinn hafa farið af stað?

Ágætlega. Það hefur verið betri mæting á leiki í vetur hjá flestum félögum og umgjörðin hefur bæst mikið hjá þeim flestum. Við tókum að vissu leyti af skarið í fyrra og brydduðum upp á nýjungum hvað varðar umgjörð á handboltaleikjum á Íslandi og fyrir styrktaraðila og velunnara. Það er því fagnaðarefni að fleiri félög hafa tekið sig á og gert svipaða hluti. Það eru einnig þó nokkrir mjög efnilegir leikmenn á leiðinni sem verður fróðlegt að fylgjast með næstu árin.

Spá um úrslit í leiknum?

Við vinnum 30-25.

Við þökkum þessum herramönnum gott spjall. Megi betri aðilinn vinna!

Stumble It!