Þjálfari meistaraflokks karla í FH, Elvar Erlingsson, situr nú fyrir svörum á FH.is eftir góðan og mjög mikilvægan sigur í fyrsta leik deildarkeppninnar gegn vel mönnuðu liði Akureyrar. Elvar var spurður út í komandi tímabil, væntingar og samanburð við liðið sem hann þjálfaði um aldamótin síðustu.

Hvernig leggst svo tímabilið í Elvar?

„Tímabilið leggst bara mjög vel í mig. Þetta er náttúrulega stórt stökk á milli deilda. Við erum búnir að undirbúa okkur vel og erum tilbúnir í þetta að mínu mati. Síðasti vetur gekk vel og notuðum við því þann tíma til að undirbúa okkur fyrir úrvalsdeildina. Við erum í nokkuð góðu standi hvað varðar líkamlega þáttinn, 3 leikmenn í meiðslum, svo mér líst nokkuð vel á þetta.

Okkur var spáð 7. sætinu í deildinni á þessum árlega fundi sem er eðlilegt að mínu mati enda erum við nýliðar í deildinni.“

Ertu ánægður með leikmannahópinn?

„Já, við fengum 4 nýja leikmenn, þá Hjört Hinriksson og Magnús Stefánsson sem komu aftur heim ef svo má segja og að norðan fengum við Ásbjörn Friðriksson og Arnar markmann svo við erum ekki á flæðiskeri staddir hvað varðar leikmenn. Í þessum leikmönnum erum við að fá menn með reynslu úr Úrvalsdeildinni, menn sem hafa unnið titla, spilað í Meistaradeildinni og svo mætti lengi telja. Þetta er góð blanda að okkar mati, eldri og reyndari leikmenn með yngri strákum sem eru mjög efnilegir.“

Leikstíll liðsins, hvernig er hann?

„Við erum með aggresíft lið með ákafa og vilja til að æfa mikið. Ákefðinni fylgir að það eru gerð mistök í svona hröðum bolta og með þessum mönnum sem hafa reynslu erum við að takmarka þessi mistök.“

Hvernig hefur undirbúningurinn verið. Er hann eitthvað frábrugðinn frá því sem var í fyrra?

„Að einhverju leyti kannski. Það felst í því að við höfum eytt miklu púðri í lyftingar auk þess sem við tókum út að mestu erfið malbikshlaup og lengri hlaup. Við færðum okkur meira yfir í áfangaþjálfun í sprettum þar sem handboltaleikmenn hlaupa ekki jafn miklar vegalengdir og t.d. knattspyrnumenn. Þannig að það voru smá áherslubreytingar já.“

Æfingaleikir, hvernig hafa þeir gengið?

„Við lékum einhverja 12 leiki sem gengu ágætlega. Við höfum unnið þokkalega sterk lið og átt nokkra góða leiki gegn Úrvalsdeildarliðum svo við erum klárir í bátana og höfum undirbúið okkur vel.“

Eru einhverjar horfur á því að það bætist við leikmannahópinn?

„Við erum að horfa í kringum okkur eftir leikmanni og það eru ákveðnar þreifingar í því en ekkert sem hægt er að gefa út.“

Hverjar eru svo væntingar þínar fyrir tímabilið?

„Við setjum okkur einhver markmið sem við skiptum niður en fyrsta markmið er náttúrulega að halda okkur í deildinni, annað væri fífldirfska af okkar hálfu. Við getum ekki leyft okkur eitthvað meira og ef eitthvað er að marka spádóma og kristalskúluna verðum við að ströggla en að sjálfsögðu ætlum við okkur eitthvað meira sem við höldum fyrir okkur. Við ætlum að reyna að festa okkur í sessi í þessari deild.“

Næsti leikur liðsins er gegn HK, er það vinnandi vígi?

„Já,já. HK-liðið er náttúrulega sterkt og munu taka á því frá fyrstu mínútu. En eins og ég segi að þá erum við tilbúnir í slaginn og viljum byrja mótið vel. Við erum með góða liðsheild og eigum að fljóta vel á því.“

Þú hefur þjálfað liðið áður, fyrst í 3 ár sem aðstoðarmaður Kristjáns Arasonar og svo sem aðalþjálfari veturinn 1999-2000. Er mikill munur á landslaginu í boltanum frá þeim tíma?

„Já, það hefur breyst töluvert en kannski er ósanngjarnt að bera þetta saman hvað varðar liðið. Þá vorum við með mun rútíneraðra lið og um leið reynslumeira. Yngri kynslóðir voru að koma inn þá, og ég nefni Hjört, Gunnar Narfa, Lárus Long, og Steini var að stíga sín fyrstu skref en jafnframt voru margir reynslumeiri menn í liðinu þá. Liðið núna er nánast eingöngu skipað ungum mönnum. Áður fylgdi liðinu meiri pakki, eiginkonur og allt svoleiðis en núna er þetta öðruvísi, það er minna í kringum þetta.

Núna er 8 liða deild miðað við 12 liða deild sem var með 8-liða úrslitakeppni. Við enduðum í 7. sæti minnir mig en það sem skýtur upp í kollinn hvað varðar breytingar er að hraðinn er orðinn meiri en hann var.“

Hvað með skilaboð til FH-inga?

„Ég segi nú bara sem oft áður að fólk þarf að láta sjá sig í húsinu og styðja vel við bakið á liðunum. FH á góðan kjarna sem fylgt hefur liðinu lengi en það er náttúrulega sama gamla sagan að það er okkar að draga fólk í húsið með góðri spilamennsku. Jafnframt verða FH-ingar að hjálpa okkur með góðu umtali, vera bjartsýn og sýna hlutunum biðlund og taka tillit til þess sem verið er að gera. Núna er annar pakki frá því sem var í fyrra, mun stærri pakki.“

Það var skeleggur blaðamaður kynningarmálaráðs handknattleiksdeildar, Hilmir Heiðar Lundevik sem ræddi við Elvar.